Laerskool Burgersdorp het hierdie jaar omtrent gewys wie is baas in die Besigheidsliga van die Rolbalklub. Die span het elke oomblik geniet en wil ‘n groot dank uitspreek teenoor die Rolbalklub vir hul moeite en al die reëlings. Ons het die 2de plek in die liga los-“gerol” en ‘n kontantprys gewen.

Baie dankie aan al die borge en ook ons afrigter, tannie Hester Venter.

Ons hoop om volgende jaar ons titel te kan verdedig!

38 Gr 1’s het verlede Woensdag hul eerste dag van 12 skooljare beleef!
Groot-oog, skamerig, bang, en party vol selfvertroue!, hare netjies gekam en met skoon, blink skoene het hulle hul nuwe juffrou/meneer ontmoet.  Ja, ons het vir die eerste keer in Laerskool Burgersdorp se geskiedenis ‘n meneer by gr. 1!!  Mnr. Alwyn Swanepoel het verlede jaar by die skool aangesluit in gr. 4 en hy is vanjaar “bevorder” tot gr. 1!!
Juf. Almari Marais en mnr. Alwyn Swanepoel sal vanjaar die gr. 1’s “grootmaak” en die fondamente van hul komende skooljare lê.  Daar is 18 dogters en 20 seuns.  8 is koshuisinwoners en ons verneem hulle is ook al baie tuis.
Laerskool Burgersdorp verwelkom elkeen van hierdie nuwe leerders en hul ouers en ons glo julle sal die volgende 7 jaar baie geniet.  Skakel in, neem deel en gebruik al die geleenthede wat die skool julle bied.
Ons verwelkom ook vanjaar 2 nuwe studente.  Ook ‘n eerste keer vir die skool – ‘n egpaar!  Andries en Carol de Bruin het na ‘n hele paar jaar in die korporatiewe wêreld, besluit onderwys is die één ding wat hulle albei eintlik wil doen.  Carol sal hierdie jaar by juf. Lana in gr. 2 deurbring en Andries “begin” sy skoolloopbaan in gr. 5 by juf. Antoinette. 
Juf. Almari was vir 4 jaar lank deel van die personeel as student, maar nou is sy amptelik ‘n juffrou – sy het oorgeneem by juf. Mareen Koen wat aan die einde van verlede jaar afgetree het.